الأحد , يناير 29 2023
أخبار عاجلة

بالفيديو ماجدة الخطيب :” داغة الصومالية ضحك عليها وورطها بالمخدرات وطلبت مني تشوف الاهرامات!”

متابعة/ حسانة سليم

وروت الفنانة ماجدة الخطيب في حوار لها مع الفنانة صفاء أبو السعود خلال برنامجها «ساعة صفا» عن تجربيها في سجن القناطر، وكيف واجهت المسجونات، ووصفت تلك الفترة بأنها ذكريات لا تنسى من حياتها..وكشفت الفنانة الراحلة، عن أنها دخلت سجن القناطر أثناء تمثيلها لعدة أفلام بينها فيلم «دلال المصرية» وأيضًا كمتهمة: «لما دخلت السجن كمذنبة لقيت أن مش هو ده السجن اللى دخلته لما كنت ممثلة، السجن الحقيقي حياة تانية وجدران تانية، تجربة السجن صعبة جدا جدا، قابلت في السجن نماذج كتيرة وحواديت كتير، الستات في السجن مش زى ما بيظهروا في السينما معلمين وكده، لا الواقع مختلف تمامًا، والجرائم اللى متهمين بيها طبعا مختلفة، فيه سرقة وقتل خطأ زي حالاتى، لكن أغلب الحوادث من ستات في الأرياف، غالبا معظم الجرائم ست صغيرة متجوزة راجل كبير واتفقت هى وعشيقها على قتله، حتى الحوادث الأخلاقية مش بيظهروا زى السينما ماسكين سيجارة وميكب وبيضحكوا ضحكة رقيعة، ولا موجودة اللى مضروبة مطواة في وشها واللى حطة موس في بقها».

وذكرت الفنانة عن تجربتها في السجن، أن جميع من كانوا هناك تعرفوا عليها باعتبارها نجمة مشهورة: «كانوا ماسكين ودنى وبيحكولى حكاياتهم، كلهم مذنبين بدرجات لكن قليل أوى لما أسمع حكاية وأقول دى دخلت السجن إزاى، وقولت إن تجربة السجن دي هتحولني لمؤلفة وهنافس شقيقي في الكتابة، لكن رجعت وقولت ولا مليون مؤلف هيعرف يألفها زي ما حصلت».. وعن أكثر حكاية تأثرت بها خلال فترة تواجدها بالسجن: «أكثر نموذج اتأثرت بيه بنت صومالية اسمها (داغة) طويلة وجميلة، أبوها ظابط مهم في الجيش وسفرها الهند تدرس هناك، وهناك قابلت ولد مش فاكرة جنسيته إيه، وابتدا ياخدها للطريق الغلط، يشربها مخدرات وخمرة وحبوب هلوسة وجه في مرة أقنعها إنها تنزل مصر، ركبت معاه الطيارة راح نزلها مطار دبي واشترى لها ريكوردر وقالها مطار مصر زحمة لو توهنا من بعض نتقابل في فندق هيلتون، البنت سمعت كلامه ونزلت مطار القاهرة وكانت مخمورة لأنها شربت كتير في الطيارة، واتمسكت في المطار ولقوا هيروين في الريكوردر اللى ادهولها، دخلت السجن وكان عندها 18 سنة، ومحكوم عليها بـ20 سنة، وقالتلى والنبي أنتى ممثلة ومشهورة قبل ما اترحل خلونى أشوف الأهرامات، فكرت أخليها تقعد معايا في مصر لأنى حبيتها وهي بريئة وواحد ضحك عليها وراحت في الرجلين، كنت مستعدة استضيفها في البيت، وكنت بروح ازورها وأبعت لها جوابات».

شاهد أيضاً

آخر صورة لمحمد العربي قبل خبر وفاته وهذه النجمة اللبنانية تزوجها؟!

متابعة/ حسانة سليم تصدر اسم الفنان المعتزل محمد العربي محركات البحث في مصر، بعدما انتشرت …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *