الأحد , يناير 29 2023
أخبار عاجلة

بالفيديو.. لماذا انسحب شريف منير وماذا قال عن الفيلم المسيء لمصر؟

متابعة/ حسن الخواجة

في أول رد له على هجوم الفنان شريف منير على فيلم “ريش” والذي عرض ضمن فعاليات مهرجان الجونة ؟؟ قال المخرج والمؤلف محمد دياب : كلام الأستاذ شريف منير ان الجوايز اللي خدها فيلم ريش هي مؤامره من الغرب علي مصر كلام خطير جداً خاصه انه من فنان كبير.. هتكلم من خبرتي كشخص عضو لجنه تحكيم في مهرجان كان، و عضو في اكاديميه الاوسكار: قولاً واحداً مفيش انسان لا بالتلميح و لا بالتصريح عمره ما بيحاول يأثر علي اختيارات لجان التحكيم و اللي اعضاءها بيتكونوا من فنانين مميزين من انحاء العالم. اداره اي مهرجان دورها بينتهي بإختيار الافلام المشاركه و نقطه. و يسأل في ذلك الفنانين اللي كانوا اعضاء لجان التحكيم في المهرجانات الثلاثه الكبري زي هند صبري و نيللي كريم و محمد حفظي.

وبشأن ارتباط أفلام الفقراء بالمهرجانات أوضح دياب :” طب ليه الافلام اللي بتروح مهرجانات بتبقي عن الفقرا او عن المشاكل؟ الافلام المستقله في العالم كله هي الافلام اللي خارج منظومه الانتاج التجاريه، يعني الافلام اللي مش لاقيه انتاج و دي بتبقي دايماً الافلام اللي عن المهمشين او الناس اللي ملهاش صوت، و بما انها افلام مش متوقع منها تجيب فلوس فبيبقي عند صناع العمل الجراءه انهم يعملوا اختيارات فنيه جريئه و ده بيخليها مغريه للمهرجانات اللي بتدور علي سينما جديده و مختلفه.. سنه 2019 الفيلم اللي كسب البالم دور هو (شوب ليفترز ) الياباني ، و سنه 2020 اللي كسب نفس الجايزه هو (باراسيت) الكوري و بعدها اكتسح الاوسكار. الفيلمين عن العشوائيات في دول عالم اول و بلادهم احتفت بالفيلمين و بصانعيهم بالرغم من ان العشوائيات نسبتها في الدولتين لا تذكر.. المميز في فيلم ريش مش الفقر علي الاطلاق بل اسلوب مخرجه الجرئ و طريقه سرده المختلفه، و سواء عجبك الفيلم او لأ لازم نشيد بإن الفيلم ده فيلم بصوت و طعم مختلف فنياً مش موجود في السينما المصريه. الفقر و المشاكل لا يمكن يدخلوك مهرجان كبير لو مفيش جوده صنع او تجربه سينمائيه رائده”..

وعن فيلم ريش قال محمد دياب : “فيه تجريد للمكان و الزمان، و الفقر فيه خلفيه للقصه لدرجه ان المكان مش شبه مصر و لا أي مكان في العالم.
و لو الفنانين نفسهم هم اللي بقوا بيرددوا الاتهامات اللي من نوعيه تشويه مصر فدي مصيبه، لأن الكلام ده فيه مزايده علي الرقابه و علي منتجي الفيلم و علي المهرجانات اللي بتختار الافلام و هيخلي اي فيلم عن المهمشين متهم بالتزلف و بيصعب انه ينتج او يُجاز …و للأسف الكلام ده بيخلي الرأي الشعبي يبقي دايماً حاطط افلام المهرجانات في وضع المتهم: اكيد اختاروا الفيلم عشان سبب غير مستواه الفني.كلام فيه انسحاق و هزيمه و كأننا معندناش القدره نعمل حاجه كويسه.”

بمنطق استاذ شريف كان هينسحب من عرض الفيلم العظيم الكيت كات اللي كان بطله و قدم فيه دور عظيم و كنا اتحرمنا من اعظم فيلم مصري.
عمر الزهيري مخرج مصري واعد و يستحق مننا كلنا التحيه و التشجيع، و فيلم ريش مدحه و ذمه لازم يكون في داخل الاطار الفني فقط.. وعلق الفنان شريف منير، على انسحابه من مهرجان الجونة السينمائي في أثناء عرض فيلم “ريش”، قائلا: “كل ما يعرض بيخلي شكل مصر مش حلو، وأسر عايشة في عذاب غير طبيعي، وعبارة عن ناس تعيش في قذارة”.. وتابع قائلاً: قررت الانسحاب لأن الفيلم لم يجسد أيا من الحقيقة  في مصر، وهذا رأيي الشخصي.. وأضاف منير، خلال مداخلة هاتفية له مع الإعلامي عمرو أديب، في برنامج “الحكاية” المذاع عبر فضائية ” إم بي سي ” الصورة اللي كنا بنشوفها أيام حين ميسرة لازم تختفي لأننا نرى الآن عشوائيات تتحول إلى مساكن لائقة والجميع يلمس هذا الأمر على أرض الواقع، لافتاً إلى أنه لم ير أي إبداع في العمل الفني بعيدا عن عدم التطرق الى الحقيقة.”..وأكد الفنان شريف منير، أنه يتعجب من لجنة التحكيم التي أعطت هذا الفيلم جائزة كان، لافتاً إلى أن فيلم الكيت كات لم يكن بهذا الشكل الفج.

 

شاهد أيضاً

تاليا تطلق “يا الغالي” باكورة أعمالها الغنائية

أطلقت الفنانة اللبنانية الجزائرية “تاليا” أولى أعمالها الغنائية “يا الغالي” من إنتاج شركة “لايف ستايلز …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *